19.10.2015


bitte ned uf mini blödi grimasse luege...sorry gseht würkli beschisse us;-)))


ha derfür no es paar böudli ine gstöut;-)

28.09.2015

 

ha no es paar böudli inegstöut vo der zyt mitem mike und der jiajia...

 

bis gli

24.08.2015

am 19.8. hei mir e usflug mitem ricardo und der joyce gmacht. der ricardo het üs mitgnoh , er het gseit mir mache e flusswnderig, mir söue gueti schueh wo ou dörfe nass wärde mitnäh und so hei mir de ou packt und üs gfreut mit dene 2ne e schöne tag zverbringe .er esch üs am haubi zähni am morge cho hole und los esch gange. i ha mi wahnsinnig gfreut, ändlech weder öpis angers. mir hei der glich wäg gnoh wo der pesche und ig gmacht hei wo mir a gross gmüesumschlagplatz gange si. bevor mir aber dört häre cho si hei mir e gueti haubstund müesse warte um die schmali stöu i de bärge zpassiere, es esch nämli der haub bärg abecho gsi und das hei si zersch müesse wäg ruume!
dört bim gmüesmäret si mir zwüsche de hüser ufe, sehr gheimnisvoll und sehr schmal, aber der ricardo het der wäg jo kennt und het si sach aus schofför sehr guet gmacht!
mir si ca e stund spöter dört acho, hei de müesse ca e haubstund loufe, dure urwald säg i euch, elei würd i dört nie dure loufe, der kennet mi jo, i go ned emou dure tag elei i wald i der schwyz, geschwiege denn do dure dschungu😱 aber i bi jo guet behüetet gsi vo 2 starche manne , joyce chani leider ned rächne, si esch nur e haubi portion😂
auso mir am loufe, aues mucksmüslistöu...das esch me sich do gar ned gwöhnt, philippine esch nämli ei grossi feschthütte und so katholisch wie si gäng wei si, aber sufe und feschte chöi si äuä scho, überau esch immer fiesta , überlut musig ou i de ichoufscäntr, dört muesch nag abrüele um di nochber zverstoh! oder de bäue d'hünd, oder güggle chräie, aber öpis esch immer, aber do...
auso uf jedefau i ha die ganz zyt glost ob i ned doch nöime musig ghöre oder es outo oder e töff, aber nei nüt, eifach nur stille😊 i bi seelig gsi

wo mir de nachere haubstund plötzlech wasser plätschere ghört hei hei mir üs gfreut wie chind uf der schuelreis. plötzlech het sich der waud chli glichtet und mir hei e wasserfau gseh, mir hei jo gar ned gwüsst ds mir zumne wasserfau göh, er het gseit e flusswanderig😀 und jetz simer plötzlech am "cambais wasserfau" bei alegria uf cebu gsi. das esch uf der andere inslesyte im süde.

mir hei glachet und si gsprunge, aber der ricardo het üs brämset, er heit gseit, passet uf es esch glatt und das esch ou nur der erschti teil vom wasserfau, dä het nämli 3 teile wo me cha gseh..auso mir si weder chli gemächlicher gloufe und wo mir de bim erschte chliine seeli acho si, hei mir üs müesse umzieh, badhose alegge, badhose?? mir hei keini badhose bi üs gha, es het gheisse mir mache e flusswanderig...ok i ha mini shorts abzoge und bi mit de underhose und em t'shirt is wasser, der pesche nur mit underhose😀...jetz hets gheisse , ab is chaute(ca 18°) wasser, abr das esch natürlech nur es churzes ougeblickli gsi wos eim chaut dünkt het, es esch e wahri freud gsi, weder einisch e richtigi abchüelig z'erläbe. mir si auso buchtöif im wasser zur nöchschte träppe für eis stockwärk ufe zgoh. dobe acho, esches weder dürs, dasmou nochli töifere wasser gange bis zur nöchschte stufe, das esch dasmou e leitere gsi, mir si einszwei dobe gsi und dört hets e wunderbare chliine see gha wome super het chönne bade im chaute wasser eifach nur super, mir heis gnosse! der bescht esch jo gsi, mir si alleini gsi, kei mönsch wyt und breit , e wasserfau nur für üs ganz elei!
nachemne usgebige bad si mir langsam zrug, der ricardo und der pexche hei natürlech bim 2.teil vom waserfau e abchürzig gnoh und si vo obe abe gsprunge, mir froue hei der normau wäg über steiträppe gnoh.

nachdem mir weder agleit si gsi, hei mir üs zrug ufe wäg zum outo gmacht. übrigens das huus ufem foto im wald, esch ca 200 m vom waserfau ewäg, es het immer lüt die wohne im urwald, aber so es schöns hüsli mit vorhäng hani no nie gseh mits im wald...

jetz hei mir dänkt mir göh weder hei, jo mir si scho richtig hei, aber e andere wäg, mir si weder no höcher id bärge und mir hei chönne ussicht und aues nöie gniesse!
underwägs imne dörfli, het der ricardo aghaute esch ane pouletstand go poulet und ris chofe und denn simer a strand und hei gmüetlech pic nicet, eifach nume schön!

nachem ässe esches wytr gange, richtig hei, er het gseit i zeige euch jetz no "der ort der ruhe" er het das so touft wöu er das passend findet..i ha mir jo nüt chönne drunder vorstöue, uf de philippine ort der ruhe....?? mir si überne pass gfahre und plötzlech het er mits uf der stross aghaute und het gseit stieget us, i ha dänkt, he??
aber woni usgstiege bi hani gwüsst was er meint, mir si ufe stross gstande und es esch keis outo oder kei töff gfahre, mir hei chönne mits uf der stross loufe und hei kei angscht müesse ha überfahre zwärde, eifach nur toll! wöus so schön esch gsi, si mir grad nochli gloufe. plötzlech hei kir uf oslob abe gseh und apo island het me ou ganz guet gseh, super usssicht.

so weder istiege, heiwärts...jo hei mir gmeint, in oslob het er plötzli rächts abboge und de si mir ine wunderbare park cho, ou keini lüt und ruhe pur! dört hets e ganz auti chele gha und 2 oder 3 ruine no vo de spanier noche, super!

so jetz si mir aber heizue, es esch jo scho 3 gsi und der ricardo und joyce si de am ober ou weder no iglade gsi amne geburi hei auso hei müesse...mir hei e wunderbare tag erläbt wo mir ned wärde vergässe, danke ricardo, thanks joyce😙

auso der taifun hei mir guet überstande, bi üs hets eifach 2 tag chli gluftet und s meer esch sehr wöud gsi, aber süsch merke mir eigentli do nüt !

böudli lad ig de no me ufe, ha grad es problem mitem internet..auso eifach nöschtens weder mou ineluege:-))

13.08.2015

mir hei ned sovöu erläbt, der pesche esch 2 woche nüm gsi go touche, er het problem mit de ohre gha und mir esch ou e ganzi woche, sogar e ganze tag im bett gsi,  ned so guet gange..i ha sicher der taifun gspürt! mir hei jo weder e riese taifun gha im norde und bi üs hets es paar tag ou rächt starch gluftet und mi chopf het gseit, das esch kei wätter für mi;-((

mou es paar date übere taifun "hanna" so het er nämli gheisse..

 dä taifun esch im meer usse gsi, het e durchmässer gha vo 750km und esch zum glück ned ufs land gstosse..

er esch ca 950 km vo üs ewäg gsi und jetz chame sich vorstöue wie das tuet wenn sones ding übers land fägt, wenns bi üs  scho so ghudlet. het. i bi froh um jedes mou wo die dingerned zu üs chöme:-(

einisch hei mir weder e ausflug gmacht zum wasserfall in oslob, mir hei wöue go luege obs meh wasser het, chli meh aus 1. mou hets gha, aber glich immer no spärlech. mir wärde imne monet weder go luege wies usgseht mitem wasser;-)

am 30.08. chunnt der mike no einisch mit sire frou und de wärde mir es paar kuuli sache ungernäh...werde brichte;-)

der flug uf kambodscha esch buechet und mir freue üs riesig..am 8.10. geits los. vorhär müesse mir aber glich ou no weder paar sache erledige. zum bispöu chasch ned eifach zu de philippine usreise wenn es haubs johr am stück bisch do gsi, de muesch uf migration gone bestätigung hole, dass niene schulde hesch oder süsch irgendwie dräck am stäcke! auso heisst für üs weder mou e tag in cebu city:-( i hasse die stadt:-( aber was macht me ned aus wenn me chli wott umereise;)

so jetz wett i no e chueche bache, mou luege was derbi usechunnt..

wünsche euch aune e gueti zyt bliebet gsund und heit sorg zu euch!!

ganz liebi grüess us alcoy


2307.2015

so mir si geschter us malapascua zrug cho und es esch e tolle usflog gsi!!

malapascua esch e mega schöni insle, im norde oberhalb cebu...mit dem boot fahrt me öppe e haubstund vom hafe in cebu und de steit me im wysse sand und gniesst zersch mou eifach das tolle insle fieling...

mir hei leider chli päch gha mitem hotel, es esch ned so schön gsi wie mir üs das vorgstöut hei, aber nur zum schlofe esches gange!

aber jetz mou vo vorne, auso mir si am sunntigmorge am 7ni abgfahre und hei der wäg , übere bärg uf die angeri syte vo cebu gwäut, wöu mir das so vorgschlage hei übercho im internet! aui womer mitne drüber gred hei, hei zwar gseit mir söue dür stadt dure fahre, aber mir hei üs de glich für e bärg entschiede...uf jedefau si mir super guet gfahre und 7 std spöter, inkl bootsfahrt uf d'insle, si mir uf malapascua gstande...auso sehr e gueti zyt für cebu;-) die ganzi fahrt vo alcoy a hafe vo cebu si ca 225km

malapascua esch bekannt bi de toucher für fuchshaie, das esch jo klar, das der pesche die het müesse go luege;-)

auso wenn mir nöime härechöme de esch immer eine vo de erschte schritte, ine touchbasis zum luege wo und wenn chame go touche. mir hei glück gha und im hotel hets grad e basis gha, auso escher go froge und het de i 2 tag chönne go. er het am morge am haubi füfi uf müesse und de si si ab go fuchshaie sueche und si hei se gseh! 4 stk heter verzöut heiger gseh! leider hei si ned so super sicht gha, aber me cha ned aues ha im läbe;-)

malapascua esch natürlech sehr touristisch, me cha überau ässe und trinke , leider esch de haut ou aues sehr tüür! am obe esches wunderschön gsi, im wysse sand höckle mit fackelliecht und öpis trinke(ou wenns nur wasser esch), eifach romantisch!

es esch jo low saeson im momänt, das heisst kei saison, und vo dem här esches am tag fasch mönscheläär gsi, wöu natürlich 99% wägem touche dört häre göh und die chöme de ersch am obe weder zrug. aber ou am obe esches agnähm gsi, ned zvöu lüt kei lärme, niene luti musig eifach schön.

im novämber 2013 esch jo dä schwär sturm über malapascua gfägt und het praktisch aues zerstört, inkl. vielne palme, es het immer no vöu ruine dört und palme wo nur no der stamm steit, die meischte hei jo ihri hüser, hotel usw weder ufbouet, aber es het haut ou immer serigi wo entwäder kei gäud hei, oder de hei si d'nase vou vom ewige weder ufboue und ziehnd wäg...

mir hei no e "usflug" mitem motorbike zum lüchturm uf der insle gmacht, esch nur churz gsi, aber der fahrer, het üs chli sache zeigt und esch ou chli is insleinnere mit üs zu de iheimische.. leider hani ned vöu foto vo dört, i ha immer es schlächts gfüeh weni die lüt wott fotografiere, i dänke aube , i häts ou ned gärn und würd mir wiene aff im zoo vorcho, auso heit verständnis weni ned vöu lüt zeige!

auso mir hei die zyt  uf dere chliine insle sehr gnosse...mir si ou no go umelege wäge hotel und hei 2 gfunde wo üs sehr guet gfaue hei und mir wärde nöchscht mou eis vo dene wähle;-) das heisst, mir si ned s' letschte mou dört gsi;-))

leider si die 2 tag uf der insle sehr schnäu verbii gange und mir hei üs weder müesse ufe heiwäg mache...

i verzöue euch jetz mou wie sone 225 km fahrt uf cebu ablouft;-)

auso mir si am 8i mitem boot abgfahre und am habi nüni si mir mitem outo zum hafe in maya usgfahre..mir hei üs entschiede gha, dasmou der wäg dür stadt znäh..eigentli aues tip top gange, bis ufe verchehr...esch natürlech mittwoch gsi und ned früeh am morge, aues esch ungerwägs gsi und mir ou;-))

uf jedefau si mir 2.5std und 94 km spöter in carmen gsi, no wyt e wäg vo cebu city...:-(

3.5 std und 126km gfahre, si mir in mandaue, e vorort vo cebu city gsi, e leichte hoffnigsschimmer dases doch no längt am gliiche tag für hei!

üse ahautspunkt esch talisay gsi, wenn mir in talisay sind , de hei mir stadt hingerüs...aber mir hei ou gwüsst in minglanilla esch e bouschtöu dört wirds stou ha, aber wenigschtens afe mou zur stadt us...

talisay 140km und 4.5 std spöter....mir hei afe hunger gha, aber mir hei bis carcar wöue düre fahre damit mir schlimmschte hinger üs hei!

carcar, ändlech öppis go ässe... 20 minute spöter , auso 14.30  abfahrt richtig hei

punkt 4i , 225 km und 8 std spöter si mir deheime gsi, auso ou ned schlächt für das mir dür d'stadt dure si...aber asträngend, der müesst euch vorstöue, do esch outofahre würklech keis vergnüege sondern pure stress, entweder steisch im stou, oder du hesch stop and go oder de hets strosse wo ned chasch fahre wöus au paar meter riese löscher het, oder de chöme tricycle vo links rächts hinde und vore....auso für 225km 7.5 std esch scheisse;-))

mir si froh das mir weder gsund und ohni unfall si heicho und freue üs scho weder ufe nöchscht usflog..

no churz öpis zum wätter wo mir do hei, es esch jo eigentlich rägezyt sit am 1. juni, aber mir hei no nie e ganze tag räge gha, einisch esches öppe 3 tag chüehler gsi und bewölkt, zwüsche dure, aber meischtens ir nacht oder am morge früeh, hets mou chli grägnet. es esch immer no super wätter und sehr warm, auso immer no jede tag über 30 grad. positiv ar rägezyt, ir nacht chüelets doch ziemli ab, so ca 25 grad.

   

16.07.2015

schynt so aus hät sech üse autag do greglet...mir hei ned vöu erläbt und drum hani ou nüm vöu zum schrybe..es esch e so, das mir haut immer no vöu ir stadt si wägde uswyse und au dem züg...z.b. simer scho 2 mou i der city gsi wägem führeruswys und mir hei s'original immer noni...si hei kei plastik übercho vo manila;-) auso fahre mir eifach immer no mitem tämporäre uswys ume*lach* aber das esch do ned so schlimm, das verstoht do jede;-)

mir hei e usflog gmacht zum umschlag - markt oberhalb dalaguete...weis grad ned wie das dorf heisst...das esch sehr idrücklech gsi, dört chöme laschtwäge us der ganze region und hole gmües und frücht ab, vo de buure wo das mit chliine outöli oder mängisch sogar mitem tricycle a dä maret lö lo bringe und de verchoufe, und die laschtwäge bringes de ane angere märet uf der insle, oder mängisch sogar ou no uf angeri insle. das esch richtigi schwärschtarbeit, do wird aues no mitem eigete körper gmacht, kei krane wo die schwäre chörb vou mit chöhli oder früehligszwebeli, oder vou mit mango usw. uf d'woog stöut und de wyter ufe laschtwage lad, nei aues "handarbeit" zum biespöu dä chorb mit chöhli, das si 177kilo gsi, wo ei einzige maa mitemne gurt woner ume chopf gnoh het, eifach abem laschtwage glüpft und zu der woog gloufe esch und dört het er sogar no e momänt müesse warte, bis er dä schwär chorb ändlech het chönne uf d'woog stöue...auso üs si fasch d'ouge zum chopf us gheit wo mir gseh hei wie schwär das dä chorb esch...

mir esches jo mängisch ou längwylig, de versuechi mi mit bache, und das esch gar ned so eifach mit dene wenige hilfsmittu und em gasofe....meischtens glingts, aber ou scho esches ghörig id hose  gange;-)

zum biespöu esch der pesche gsi go touche und de hani dänkt i mache es brot...has brot i ofe to und de hani nach ca 30 minute  d'ofetüür ufgmacht für zum luege wie wyt das brot esch,  und i ha ned gmerkt, das düre luftzug gasflamme us gange esch,...nach es paar minute hanis de gseh, ha aber ned überleit das sich der ofe i der zwüschezyt mit gas gfüllt het und ha tüüre ufgmacht und ha wöue afüüre...wummm hets gmacht und i bi ungerem chuchitisch glandet *lach*, ha e druck uf de ohre gspürt und d'ouge hei mir irgendwie weh gmacht...aber wie ig bi, bini ufgstande, has gas abgstellt und tüüre weder ufgmacht und de hani no einisch e versuech gstartet und de hets ou funktioniert...ersch nach es paar minute esch mir klar worde was eigentlech passiert esch, i bi is bad und ha i spiegu gluegt und ha mit schrecke feschtgstöut, das mini ougebraue und mini wimpere abrönnt si, so hani ou kosmetikere weder mou chönne spare*grins*..zum glück hani es chopftuech aghah wär weiss wieni usgseh hät mit glatze*lach*  ersch ca 5 tag spöter hani entdeckt, das mir ou am rächte unterarm mini schöne blonde höörli fähle;-) esch jo zum glück no einisch aues guet gange;-)

 

am sunntig wei mir für es paar tag nach malapascua, das esch e chliini insle im norde vo cebu...mir wei jo ou öpis erläbe do ;-) de gits de weder öpis zum brichte, aber ganz sicher gits schöni föteli;-)

und der nöchscht grösser usflug wird nach bacalod si, das esch ganz im norde vo negros...

 

auso mini liebi i tue jetz no es paar föteli ine und de mäud i mi weder nach malapascua

 

heit e gueti zyt, passet uf euch uf und bis gli weder mou joli und pesche

 

 

 

30.06.2015

so jetz simer scho 3 monet do...mir si am umeluege...am sache usefinde...usw

jetz het do d'rögezyt agfange und es rägnet jede tag mou einisch oder mängisch ou es paar mou, aber nur churz. im momänt esches noni so das me wett das doch ändlech weder schön wurd....i menie es esch jo glich schön und warm, eifach haut ned der ganz tag. bis jetz si mir no nie nass worde wenn mir nöime si gsi, meischtens rägnets am morge früeh oder de zobe...

mou wo mir i der stadt si gsi letscht woche wägem führeruswys, denne si mir nass worde im hei loufe vo der bushautestöu, aber ou nume wöu mir sooo lang gha hei i der stadt. so spot si mir no gar nie hei cho, aber dasd esch 4 std gange bis mir dä uswys gha hei...das esch e mega sach...do chunsch mou seisch was wotsch und de schicke si di scho ines agners gebäude mit emne bärg formular wo de muesch usfülle...de geisch mahcsch das mou und de muesch go ines fläschli bisle, dem säge si der drogetescht, für manne keis problem, aber  für üs froue, e mega useforderig( es esch s'schwerigschte gsi vom ganze tag) das fläschli esch ca 5cm häch gsi und es het e öffnig gha vo ca 1 1/5 cm....so jetz breich mou aus frou dört dri:-( na ja irgendwie si de doch es paar tröpfli dri, es esch jo ned nur das es ned breicht hesch, nei es esch der ou vergange zum bisle, wöus dermasse gstunke het i dere schiessi... aber wän wunderets, do het doch jede näbe dure bislet!!! manne hei türe ned dörfe zue tue, mir froue hei dörfe zue tue...das wär jo no schöner gsi wenn ned...uf jedefau hei mir de müesse zahle für das mir hei dörfe i das fläschli bisle und fotografiert worde si,  und de hei mir weder is angere gebäude müesse...dört hets 7 schalter gha...wo mir inecho si hei mir die formular aui am erschte schalter müesse abgäh...de hei mir müesse go abhocke und warte bis si üse name ufgrüeft hei...denn am schalter 2 simer fotografiert worde(genau scho weder) , denn weder abhocke und warte bis ufgrüeft wirdsch...denn am schalter drü, wirdsch no einisch fotografiert( me weis jo ned ob die vorhärige fotos öppis worde si) denn weder abhocke, denn am schalter 4 froge beantworte wägem pass usw was aues ned klar esch gsi...abhocke, warte, schalter 5, froge beantworte, wo scho 2 mou beantwortet hesch....denne abhocke und warte....jetz chunnts...schalter sächs:-))) jetz drafsch zahle, de chasch devo usgoh, das gli aues überstande hesch:-)  denne abhocke warte...ufff der letschti schalter....yeeeaaahhh der tämporär uswys go hole;-)) so dä esch jetz es haubs johr gültig und bis denne hoffe mir, das der drucker weder geit, damit mir der richtig uswys chöi go abhole...

so i wott jo ned jommere, irgendwie müesse mir jo der tag ou umebringe, aberi gloub es gob schöners weder uf dene schiessämter:-(


schöne usflug nach argao hei mir gmacht...esch nüt spezeills passiert, eifach chönne gniesse....


und ganz e schöne usflug zu de wasserfäll in oslob....


morn esch der erschti juli und mir fahre nach carcar go poschte, jetz simer scho lang nüm gsi und mir müesse weder mou gäud useloh, es esch mieti noche und süsch no sache zum zahle!! denn mues i ou weder sache ha zum bache,ha jo jetz agfange züpfe mache, und weni de no s'päckli vo deheime überchume, de chani de no angeri sache mache!!


so mini liebi böudli si ou online, vöu spass bim aluege und mir freue üs immer wenn dir euch ou freuet:-))




21.06.2015

so weder mou chli schrybe, es esch vöu passiert , aber i ha sicher scho weder d'höufti vergesse...es geit so schnäu und me het so gli so vöu vergässe:-)


mir erläbe do  die schönschte sunneufgäng wo ig je i mim läbe gseh ha...es esch jedesmou aus würd der himmu brönne, eifach so wunderschön!! da mir üses schlofzimmer grad gäges meer usehei, erwachet me natürkli ou dem entsprächend früeh! am 5i geit d' sunne uf und de wirds warm;-)) ömu im summer!! jetz esch scho weder chli besser!


auso mir si letscht wusche nach cebu city gfahre, mir hei es outo kouft und si de grad no der mike vom flughafe go abhole! das mitem outo hei mir natürlech weder einisch meh am lothar z'verdanke, er het aues id wäg gleitet und für üs aues bürokratische erledigt! mir si sehr froh gsi über die höuf, wöu es esch würkli ned eifach gsi, er het üs ei tag vorhär sicher 3 mou aglüte und het brichtet wie der stand esch...bim erschte telefon het er gseit, mir hei keis outo morn, wöu der verchöiffer üs es outo verchouft het wo si gar ned am lager hei gha, bim 2 telefon het er gseit mir hei jetz doch es outo, aber ned die farb wo mir hei wöue, und bim 3 telefon het er gseit, es het jetz glich so eis wie mir hei wöue! mir si gsi wie uf nodle, was erwartet üs am andere tag? keis outo, e angeri farb, oder was?? mir hei üs am morge ufe wäg gmacht nach cebu city und der lothar esch üs cho abhole und het gseit, es git zwar es outo, aber ersch am obe. auso hei mir no angeri sache erledigt, z.b. d'übersetzig vom führeruswys zum dütsche botschafter go abhole, de hei mir no gard wöue üsi ACR charte go hole, leider noni do gsi...so hei mir mou chli zyt gha cebuu city azluege! mir si go der taoist tempel go aluege, e chliine aber sehr schöne tämpel mitz i der stadt chli am bärg! scho gli esch obe gsi und mir hei üs ufe wäg zum KIA gmacht...aues het klappet und so hei mir a mim geburi, üses neue outo, i dere farb wo mir hei wöue, chönne go abhole. wo ig türe uf mache, legt e fläsche schämpis ufem sitz und es chärtli derzue zum geburi...im umschlag esch ou no e schwyzerchläber gsi, mir hei üs riesig gfreut und der chläber esch natürli ou scho am outo:-) am andere tag si mer der mike go abhole und denn si mir mit üsem neue chäreli richtig alcoy hei gfahre und heis gnosse...deheim acho, hei üs aui mit freude in empfang gnoh, der lothar het gseit, hesch scho dini spez. fäuge gseh wo am outo hesch, i ha gseit jo die gseh guet us und er het gseit, das outo wär eigentli ned für üs bestimmt gsi, aber wöu er so verruckt do het mit dene vo KIA hei si üs es angers outo gäh, auso dä wo sis outo jetz wäg üs ned übercho het, dä esch äuä ou hässig gsi;-) aber houptsach mir hei üses chäri;-)

 

am andere tag si mir grad mitem outo richtig süde gfahre, nach dumaguete, auso mit der fähre uf d' insle negros und de wyter mitem outo aues der küschte noche...mir hei es schöns hotel gfunde, leider esch am akunftstag s' wätterned so toll gsi, aber am angere tag esch super wätter gsi! mir hei 2 mou dört übernachtet und e schöne tag dört verbrocht, mit bade, der pesche natürli touche, und schnorchle und eifach nüt mache:-).

am nöchschte tag simer weder hei, wöu mir jo no angeri plän gha hei mitem mike...natürli het ou är wöue mit de walhaie go schnorchle und natürlech esch ou är hellbegeischteret gsi und mir natürlech ou weder;-)

 

leider esch der mike geschter scho weder hei, esch schön gsi, mir si jede tag go bade und go schnorchle, hei guet gässe und ned vöu gschlofe(gäu mike:-) ) i ha mini erschti lasagne gmacht sett mir do si und si esch mega guet worde!

 

bi üs het jetz doch d' rägezyt agfange, das heisst es rägnet jetz immer öppe mou...bis jetz hets aber immer nur znacht oder am morge früeh grägnet und ou nie lang, vellech mou e stund und de esch weder schön! es luftet meh weder vorhär, aber das magme guet verträge:-) letscht nacht hei mir e sturm gha, mir si erwachet chum simer im bett gsi, so ca 22.15 und de hets gluftet wie verruckt...mir vermuete mou das esch nur e ministurm gsi, aber i ha scho chli schiess gha! i bi jo de gspannt wies de tuet wenns de mou richtig stürmt!

 

hüt si mir no iglade bim ricardo, das esch e dütsche wo mir do kenneglernt hei, eigentli escher üse nochber, es esch eifach ziemli wyt wäg:-) de loufe mir hüt zu ihm und wärde dört e gmüetleche nomitag verbringe!

 

so mini liebe , es esch weder mou so wyt, mir machts warm;-) no es paar foto abelade und de esch weder fürobe:-)

 

übrigens , längizyt nach der schwyz hei mir ned, höchschtens öppe nach üsne fründe, aber ned nachem land...es längt üs wenn mir läse was bi euch passiert und wie der weder einisch meh müesst ufene schöne tag warte!! scho gli si weder summerferie und denn esch sowieso nie schön und wenn die verbi si, de esch de ou der (schwyzer) sommer scho weder verbii(mir beniede euch ned)...auso i schicke sunnigi und vorauem warmi grüess und drücke euch aui ganz fescht!!

 

 

 

 

09.06.2015

die zyt louft es esch der wahnsinn...i ha eigentli wöue jedi woche e bricht schrybe, aber i weis ned ob i das cha dure haute:-) iweiss jetz dases würkli so esch, dass die pensionierte kei zyt me hei;-))

auso das mitem töffunfau esch jo no einisch guet usgange, aber ms bei esch leider immer noni guet, es esch haut so, dass me am schienbei kei fleisch het und so hets haut knochehut gnoh und die esch jetz mega entzündet! ned nur dases weh tuet, nei es geit schynbar ou mega lang..ha jetz set geschter weder antibiotika und hoffe, das es ändli besseret!

mir hei jo no bsuech gha us kanada, der oliver, mi cousin und sini frou si churz dogsi und hei sich pudelwohl gfühlt bi üs! mir i go walhaie schnorchle und das esch der wahnsinn gsi, so öppis mues me mou erläbt ha!! am afang wenn me chunnt stinkts e chli, nach fisch haut, aber wenn me es zytli dört esch schmöckt me das gar nüm. mir si auso is boot und usegfahre, und de hei mir is wasser chönne. i bi usem boot is wasser, ha der chopf unter wassser gha und vor mine ouge, ca 30 cm esch e riese walhai gmüetlech gschwumme, i bi so verchlüpft, i ha nur no gruefe "oh mein gott" ...am walhai esches schnuppe gsi, er het sini bahne zoge und esch mit sire schwanzflosse so noch a mir verbii, das i ihn chli ha müesse wägschüpfe, i ha angscht gha er hout mir eis...aber mit der zyt het me gmerkt, wie ifühlsam die sind, die sind so langsam und gemähchlich und i ha gmerkt, dass dä genau weiss wen i hinter ihm bi gsi und mir nüt cha passiere!! eig^fach der wahnsinn!! i hoffe mir chöi das mit jedem bsuech vo üs mache, wöu das würkli öppis esch, wo me sicher nieme vergisst i sim ganze läbe!! auso lütlis, freuet nech, wenn dir zu üs chömet, esch oslob agseit!!;-)

der letscht monet hei mir chli vöu gäud brucht, aber do esch ahut ou no am pesche sin zahnarzt und s'visum für 6 monet derbii! jetz esch weder chli spare agseit! mir choufe jetz doch es outo, wöu mir haut do scho chli abgläge wohne und ohni outo esch chli müehsam! mir fahre jetz am donnschti id stadt und de chöi mirs grad mitnäh! mir fahre aber ersch am samschtig hei, wöu jo der mike am frytig zobe no chunnt für ne woche! oslob (walhaie) mir chömme*grins*

i weis noni genau was mir no aues mache, aber i wett ou mou uf siquior und uf dumaguete, auso wärde mir das äuä aues grad a eim stück mache, wenn mir scho richtig süde unterwägs si! i werde de weder brichte:-))

so i schwitze und mir louft der schweiss nur so über d'arme ab! auso i gloub i höre uf;-)) es wird de s'nöchschte mou e längere bricht gäh, mir wärde vöu erläbe i dere woche wo der mike do esch!!

am letschte sunntig hei mir no e usflug gmacht zu de luyang springs,  das esch do in alcoy, aber leider hets ziemli vöu lüt gha, mir müesse üs agwöhne üsi usflüg ned amne sunntig zmache, denne si nämli philippinos unterwägs mit ihrer ganze familie!! und ob dirs gloubet oder ned, si bade sehr gärn!!  es esch ou ned spektakulär gsi, aber mir heis wöue gseh, damit mir chöi mitrede:-)) es esch e art e philippinischi badi mit meerwasser;-) eifach schöni landschaft , schön am schatte!


vor es paar tag  hei mir weder vollmond gha, scho der 2. womir do erläbt hei, es esch der wahnsinn gsi! mir heis probiert z'fotografiere, esch leider ned eifach nur mit ere normale kamera, aber mir tües glich mou ine!

 

auso machtes guet und heit sorg zu euch mini liebe!! e dicke muntsch usem heisse alcoy!

 

bildli si natürli ou neui druff:-)

 

 

 

28.05.2015

auso i fange mou mitem letschte samschtig a wo putzfrou s'erschte mou do gsi esch..es esch jo ned so das i kei zyt hät zum putze und i mache zwüschedure ou mou öppis, aber wenn do nur churz mitem bäse dürs huus geisch, schwitzisch wienes dubeli, auso loni einisch ir woche lo putze und wäsche. so die esch auso cho, mir hei am haubiachti abgmacht gha und si esch scho am 06.45 vor der tür gstande, i ha mine ouge ned trouet, philippina wo pünktlech esch;-) i ha mega freud gha! zersch het si bett abzoge und früsch azoge und de esch si die ganzi wösch, und letscht woche hani mega vöu wösch gha, go wäsche, natürlech aues vo hang. nach 3 stund esch si go hänke. wo si fertig esch gsi mit der wösch het si im huus inne agfange, sie het aues tip top gmacht, i bi sehr zfryde gsi und i hoffe das bliebt ou e so! si het 7 stund gschaffet und mir hei abgmacht gha, das ig ihre 250 peso zahle, das si 5.- nei, ned ir stund , füre ganz tag!!  do si no 35peso fahrgäud derbi, wöu si vom bärg obe abe mitem töfflitaxi chunnt,  mängisch hani chli es schlächts gwüsse, aber das mues i jetz eifach lehre, das esch do eifach mou so. zum biespöu die wo ufem bou schaffe, die verdiene 200 peso am tag, das si grad mou 4.- und die schaffe do der ganz tag bi wyt über 30°

auso uf jede fau i bi sehr zfryde gsi und si het gfrogt ob si weder darf cho am nöchschte samschtig und i bi natürli no so froh!! jetz hoffi eifach dass, das so bliebt und si mir treu bliebt!

 

der lothar wuttke, das esch üse neu vermieter, dä het für üs aues erledigt, damit mir nur no uf d' migration chöi wägem 6 monets visum. mir hei jo natürli (no)kei drucker und das mitem änglisch esch immer no so e sach, vorauem wenns um so dokumänt geit. auso er het üs aues erklärt und usdruckt, mir hei aues usgfüllt und am mäntig esch er mit üs uf migration cho. si, der lothar und sini familie, hei jo no es stadhuus in cebu city, wöu d' vanessa dört id schuel geit. der pesche het am mäntig sowieso zum zahni müesse, er het jo sini brugg vore neu lo mache, jetz esch er chli liechter, das esch ganz liechts material, das wo är dinne gha het, esch natürli ou uralt gsi und mega schwär. so hei mir für am mäntig, grad nachem zahnarzt abgmacht, wenn mir de sowieso scho ir stadt si. wuttkes sis cho am samschtig am morge gange, wöu si no marathon loufe , und am sunntig am morge esch no e marathon gsi. mir si de am sunntig am nomi mitem bus gange und hei  im bus no grad flotti schwyzer, d'franziska und der hansruedi kenneglernt, wo aber nur do ferie mache. mir hei de chli gschwätzt mitenand und si hei  2 tag wöue go cebu city aluege, si hei gfrogt wägemne hotel i der stadt und mir hei se de mit gnoh i das hotel wo mir ou gsi si. es esch üs empfohle worde vom lothar und es esch eifach es stadthotel, nur zum schlofe. suberkeit liess zu wünschen übrig, bad esch furchtbar gsi überau hets die chliine ameiseli gha und de zmorge esch ou ned grad supi gsi. aber der zuefall hets wöue das mir , wo mir am morge si go gäud useloh, es super hotel gseh hei, nur ei stross wyter und der prys esch nur 100 peso meh, auso mir wärde s'nöchschte mou dört loschiere! mir heis ou am lothar gseit und er het gmeint, si wäre vor ca 4johr ame dört gsi, wo si no keis huus gha hei, auso er wirds ou nüm wyter empfähle. es esch do in asie eifach so, wenn es johr nüt am huus machsch de vergheits eifach und mit de tier, do muesch sowieso immer dra bliibe süsch hesch se gäng im huus. aues roschtet usw auso du muesch immer der farbchessu und anderi untensilie zur hand ha damits einigermasse schön bliebt und das choschtet haut ou gäud und das wei die meischte ned id hand näh, nur immer inäh und nüt usgäh und das geit do eifach ned!!

auso der pesche het jetz neui zähnd und mir hei es visum für es haubsjohr jupiiii:-) het aues super klappet, bi sehr überrascht gsi wie schnäu das gange esch, aui hei gäng verzöut wie mängi stund das si scho dört ghocket si, aber mir hei super glück gha, mir hei natürli ou würkli aues perfekt usgfüllt gha und mir si nach 20 minute weder dusse gsi mitem visum im pass:-) jetz chöi mir de ca imne monet no go ACR charte abhole, das esch de nochär so öpis wie üse philippinisch personaluswys. wo mir das mitem visum erledigt gha hei, ehi mir no wöue luege wägem fahruswys, aber trotz aune bemühige vom lothar het das ned so klappet wie mir üs das vorgstöut hei, üse führeruswys vo der schwyz müesse mir lo übersetze und zwar vom dütsche botschafter in cebu, aber leider het er grad ferie bis am 2.6....jo so esch das do, de bliibt eifach aues legge, es git niemer wo sini arbeit macht ir zwüschezyt;-) auso fahre mir immer no mitem internationale ume, aber das geit jo eigantli nur 3 monet...mou luege wenn mir zum herr seidenschwarz chöi go übersetze.

aber mir si jo noni fertig gsi, der lothar esch mit üs der ganz tag i der city umegfahre und het üs sache zeigt oder esch mit üs z.b. ine lade go chäs choufe usw

am zieschtig am morge, si mir de weder hei, mir hei de mit wuttkes mitem outo chönne ritte, zum glück, mir hei sovöu sache kouft gha, er het jo es riesigs outo, aber der chare esch würkli bis unters dach vou gsi. natürlech ned nur vo üs;-) s'meischte esch scho vo ihne gsi. die bruuche jo ou chli me zum ässe weder mir, die hei jo no 4 agstöuti;-) uf jedefau si mir froh gsi, das mir hei chönne hei ryte. unterwägs hei si no einisch aghaute für üs, no wägemne formular für krankekasse, wenn mir jo de ACR charte hei, de chöi mir üs do ou lo chrankeversichere und das choschtet de im johr 1200 peso das si ca 25.- auso i mues säge, si kümmere sich super um üs und mir si sehr froh, das mir so gueti lüt hei wo üs häufe!

so jetz no zu geschter, geschter hani e chliine unfau gmacht, i säges grad vorewäg DER PESCHE ESCH TSCHULD;-)

mir hei wöue e usflug mache mitem töffli und si abgfahre deheim und der töff het ned ganz der stutz uf möge wöu er noni richtig warm esch gsi. uf jedefau esch er is stocke cho und plötzlech gumpet der pesche drab und der töff macht e huere schlänker und i ha nur no chönne bei a bode ha, damit i ned a rantze ghei, jetz si aber hinde natürli fuessraschte dunde gsi und das si ned us gummi, nei das si serigi us ise und das het mir dört am schienbei aghänkt. jemers esch das grd balu worde und e bugge hets gäh und es esch bluet usecho!!! i has am pesche zeigt, was er agstöut het und er het gmeint chumm mir chere gschieder um, gang zeig das am lothar, es het würkli usgseh, wie jede ougeblick d'hut würd ufplatze, so gschwolle esch das grad gsi und dunkublau vom gstoute bluet. i auso hei, ufem hei wäg esch mir no e waran begägnet, mir hei do jo vöu aber leider hei mir säuber no nie eine gseh, aber ig jetz scho;-) er esch gross gsi, sicher 40cm körper und de no der schwanz. auso i bi hei, zum glück esches ned wyt gsi und bi zum lothar, beidi si grad usecho luege hei mi zu sech gnoh, und hei mi verarztet, zum glück, dank am lothar esches hüt nüm so schlimm. er esch ou geschter zobe no einisch chone verbandswächsu mache und hüt am morge ou scho weder und er wott im louf vom tag no einisch cho. der buggu esch fasch wäg, jetz esches eifach blau und schmärze hani fasch keini, usser weni loufe, aber das mues i jo ned würkli:-) zum glück esch nüt schlimmers passiert, aber i ha am pesche gseit er mues sich säuber es töffli choufe, i nime ihn nümm hingedruf. er cha eifach bei ned ufem fuessraschter loh wenns langsamer wird, de nimmt er immer sini bei abe und das esch ned so toll!!

so das esches weder mou gsi, es passiert natürli immer irgendöppis, aber vöu evrgissi de aube ou weder wenn is ned grad ufschrybe, aber i gloube im momänt heiter gnue zum läse:-))

jetz tueni no es paar böudli ine und de sägi tschüss

liebi grüess usem sehr heisse alcoy



22.05.2015

so mini liebe, es wird zyt das i weder mou chli schrybe..mir hei im momänt so heiss, es esch mir gar ned ums schrybe gsi. am liebschte gö mir scho am morge so ca 7.30 go bade..s' meer esch wunderbar, mängisch fasch z'warm:-) de gö mir go poschte, oder der pesche geit go touche, irgendöpis hei mir immer ufem program! so langsam läbe mir üs i do in alcoy und umgäbig, mir hei scho vöu glehrt und vöu gseh.

jetz wohne mir scho weder e woche do im neue huus und mir hei üs schnöuer weder a europäisch luxus gwöhnt, aus a täglech kampf vom kei wasser ha, oder stundelange stromusfall, es esch eifach wunderbar, wenn me cha der wasserhahn aloh und de chunnt wasser und zwar mit so vöu druck, das i problemlos cha hoorwäsche:-) auso verbii mit "eimere" sett ere woche esch weder dusche agseit *lach*

morn am sunntig gö mir für 3 tag uf cebu city, der pesche mues am mäntig am morge zum zahni und de gö mir no uf botschaft wägem visum(wahnsinn scho weder ei monet verbi) jetz wei mir grad eis mache für es haubsjohr, üse vermieter het üs ghoufe und er chunnt ou mit uf immigration und de hoffe mir es klappet aues so wie mir üs das vorstöue, de hätte mir es haubjohr rueh...de wei mir no grad wägem führeruswys go luege, ou do hei mir scho aues vorbereitet, sett auso keis problem gäh, aber wär weiss das scho vorhär bi de phils...

mir hei jetz ou e fahrbare untersatz, mir chöi s'töffli vom vermieter bruche und mir hei hüt ou scho e mega usflug gmacht:-) cool esches gsi!

morn chunnt putzfrou, si esch sich geschter cho vorstöue und de luege mir morn mou wie das usechunnt. mir hei grad chli vöu wösch, aber das macht jo nüt si chunnt jo der ganz tag, auso muess si ou öpis z'tue ha!

i brichte de weder vo cebu city und vo der putzfrou

i wünsche euch das dir ou gli warms wätter heit und der sommer chöit gniesse!!

liebi grüess usem heisse alcoy:-))

11.05.2015

es esch mäntig und mir hei üs churzfrischtig entschiede e chliini reis, so 2 oder 3 tag nach moalboal zmache..moalboal esch uf der andere syte vo alcoy, das heisst mir müesse über e bärg fahre..auso mir si ufe bus bis nach carcar, dört hei mir de bus gwächslet und si übere bärg nach moalboal..es esch würkli schön dört, aber eifach ganz andersch weder do in alcoy, es het sehr vöu tourischte und aues esch uf die usgrichtet, ei bar ar angere usw. eifach aues was touris i de ferie so wei! am sunntig bevor mir gange si, hei mir no bsuech gha vom ricardo, das esch e fründ wo mir do kenneglernt hei und er het üs no e telefonnummere mitgäh vomne fründ woner het in moalboal...wo mir acho si mitem bus in moalboal, hei mir am schmitz robert aglüte und er het grad gseit, jo klar i chume euch grad cho hole, i freue mi!! er esch mitem tricycle cho, mir hei so müesse lache!! es esch e aute ma (70) aber so öpper liebs! er het üs zu sich hei gnoh und mir hei öpis trunke und sis huus agluegt, sini familie kenneglernt und denn esch er mit üs go es hotel sueche...bevor er sich vo üs veraschiedet het, het er gseit, mir träffe üs am 6i zobe de mache mir no bar rundreis;-)) ok mir si am 6i i der bar vo üsem hotel gsi und pünktlech esch er derhär cho, er het äxtra s'tricycle mitgnoh, damit er mit üs cha im züg umefahre. mir hei ned nur vöu lüt kenneglernt a dem obe, sondern ou, was für feini getränk das es do uf de philippine git...zum biespöu het er üs gseit mir müesse unbedingt es ning-ning trinke, mir hei natürli kei ahnig gha was das esch, aber mir heis uf jedefau wöue probiere. auso hei mir 6(für jede eis, mir si ir zwüschezyt me lüt gsi) vo dene ning-ning bstöut und de bringe si es glas vou wo us gseh het wie bayleys, aber es esch no einisch besser aus bayleys...mir hei ou erfahre wie mes macht und mir wärde üs das aues a eigne um säuber ning-ning zmache...uf jedefau, si mir vo bar zu bar und es esch e verdammt luschtige obe gsi, mir hei vöu lüt kenneglernt und mir hei weder sehr vöu tips und gueti rotschläg übercho. am andere tag hei mir üs de e ruhige tag am pool gmacht und si relativ früh is bett, da mir jo am morge weder früeh ufe bus für zrug uf alcoy hei müesse. es esch e schöni reis gsi und mir si sicher ned s'letschte mou dört gsi, aber dört läbe wette mir ned, wöus eifach z'touristisch  esch...am mittwoch si mir ned der glich wäg zrug , sondern si aues am meer noche und wenn mir weder gö, de sicher dä wäg, wöus eifach vöu  schöner esch zum fahre, vöu weniger verchehr und ned so stressig! die ganzi reis mitem bus duret ca 3 std.

am donnschti hei mir is "neue" huus züglet..es esch wunderschön do, ruhig und diräkt am meer, aues neu renoviert, eifach toll! mir hei freud und gniesse das.

 

 foto folgen:-)))

 

 

 

 

 

 

06.05.2015

hüt hei mir weder ei erfahrig me gmacht:-)) mir si, wie jedi woche, mitem bus uf dalaguete a markt und zum prince, das esch es ichoufscenter, nur chli, aber mir chöme s'wichtigschte über ...im heigoh hei mir e angere bus gnoh, er het vöu schäbiger usgseh aus dä vom ceres liner wo mir süsch immer näh und mir hei gfrogt ob er nach alcoy a markt fahrt, er het gseit jo chum stieget i! mir sofort ine, es esch mega heiss gsi uf der stross und mir si froh gsi, das mir a "schärme" hei chönne. der kondiktör esch wie immer sofort cho und de het er üs gseit es choschtet 40 peso...waaasss wievöu? er seit 40, das esch me weder dopplet so tür  wie mitem ceres liner...mir hei gfrogt wieso und er het gseit, das esch der express bus und i bi fasch kaputt gange vor lache...guet mir si vellech ei minute früecher deheim gsi, wöu er ned so vöu aghaute het, weder mitem ceres liner, aber s' gäud escher effektiv ned wärt gsi...aber mir hei drus glehrt und wärde vo jetz a nur no mitem ceres liner fahre;-))

de esch no öpis luschtigs passiert, i ha ries kouft..jo i weiss nüt ussergwöhnlichs, aber für die marktfroue scho;-) die müesst wüsse, me cha do ries ned eifach im supermarkt inere schachtle oder plastiksack choufe, nei do gits der ries nur am markt und nur offe. woni s'letscht mou ries kouft ha, hani  gramm gnoh, do het mi der verchöiffer scho komisch agluegt, aber hür hani nur gramm wöue, wöu mi der letscht ries ned soo guet dünkt het, auso hani dänkt i choufe nüm so vöu, lieber de gli weder wenn er guet esch! die frou hüt het gmeint si verstoht mi ned richtig, si het gseit, " wievöu"?? und i has ihre uf der woog zeigt, es haub pfund, hinger üs si  froueli ufem bänkli ghocket, eini het vore gar keini zähnd me gha und die ander no eine;-)) d'verchöiffere het ganz lut gseit wievöu ries as ig wott und de hei aui überlut glachet *megagröhl* die hei sich chum no chönne erhole, die hei das deheim sicher verzöut und immer no gröhlet, mit ihrem zahnlose lächle;-)) der lothar, das esch dä wo mir nachär wohne, dä het verzöut, er heig e kili sack ries gwunne, am marathon, und de hani gseit, jesses de muesch jo nieme ries choufe und de hei si beidi glachet und gseit, si ässe jede morge mit de agstöute zmorge und de gits für die ries, er heit gseit, kilo längt ca  monet bi ihne...jetz wüsset dir wieso die froue am markt sich gschüttlet hei vor lache;-))

im ahang nur no es paar böudli vom markt, das esch nur e chliine markt, aber me gseht, das eim s'fleisch ässe do cha vergoh...so bis gli weder mou, schön das dir immer öppe inelueget:-))

 30.April 2015


mir hei hüt üses visum chönne go hole uf dalaguete is reisebüro, aues het klappet...esch me sich vo üs eigentli gar ned gwöhnt,*grins*...zur feier des tages si mir go uswärts ässe...2xässe und trinke het ca fr.3.50 koschtet, do hei mir bim beck näbe dra grad no 4 stückli kouft, wie berliner eifach mit vanillecreme gfüllt, die hei de ou no 16peso(ca 0.30rp) koschtet..so hei mir hüt grad chli gäud brucht;-))


Ab 15.04.2015 Teil 2

Geschter zobe esch öpis passiert, der pesche het mir gruefe „iii  frou,  chum schnäu  cho luege e spinnele“, i ha gseit jo de nimmse haut, und är seit, „ neiii die chani ned näh, die esch gross“

Ig, wie gross esch si? är seit „ so gross wie mini hand“! de hani doch müesse ufstoh und go luege, so gross wie sini hand?? Das mues i ou gseh ha! *gröhl* ha gar ned gwüsst, dass der pesche so chliini händ het *kaputtlach*.  jo si esch scho gross gsi, ha i der schwyz no nie so eini gseh, aber so gross wie sini hand*kopfschüttle*. i ha gseit machse kaputt und er het fasch id hose gmacht, er esch hin und här tänzlet aus müesst er ufs wc J i ha gseit nimm de bäse und machse kaputt, er nimmt der bäse und het mitem bäse gäge d’spinne gschlage. aber i dem momänt wo er i richtig spinne chunnt, het er vor luter angscht so ne riese satz id luft gmacht, das sogar d‘ spinne verschrocke esch und ufs chuchigstöu abegheit esch! Jetz hei mir der salat, was mache? Mir hei mou 2-3 sache abegrumet und i ha de der bäse säuber  id finger gnoh und nach es paar minute sueche und hin und här schiebe vom gstöu hani si de gseh, ha de i der zwüsche zxt e schueh id finger gnoh, und ha se mitem schueh kaputt gmacht.  nur ei schlag, si het ned müesse liede, aber wo si tod am bode gläge esch, het der pesche der schueh gnoh und het no einisch so richtig uf se igschlage, so  wie ne richtige hero *kaputtlach* ( er esch e huere schisser)J

Mir si hüt scho früeh im meer gsi go bade, es esch eifach troumhaft, me esch ganz elei mit es paar fischer, i freue mi wahnsinnig weni nüm dä wäg mues mache für zum go bade!

Hüt am 3 si mir iglade bim lothar, besprächig wägem huus und de chunnt us ob mirs chöi ha oder ned…Yeeaaahhh mir heis übercho, ab mitti mai dörfe mir zügle!! mir freue üs mega!

Mir si wie jede donnschtig am märet gsi, es esch jede tag i der markthalle öpis los und me cha jede tag früsches gmües und frücht, oder ou fleisch oder fisch choufe, aber mir choufe immer nur gmües und frücht, mir ässe ziemli fleischlos, bis öppe uf es paar pouletstückli wo mir am grill vor der markthalle choufe. Aber am donnschti esch immer vöu los, de hets no ganz hufe chleiderständ und süsch auerlei. mir choufe eigentli immer do i, mir hei s‘ gfühl mir wette das chli unterstütze!

Der pesche het hüt wöue 2 touchgäng mache, auso hani mi entschlosse is meili beach go zbade. Das esch es beach resort diräkt unde a üs, sehr schöni alag, vomne schwyzer gführt, aues sehr nätti lüt!

I bi ganz elei dört gsi,und ha so richtig d’rueh chönne gniesse, ha no es guets buech gha, d‘ wäut esch ir ornig! J leider het grad hüt s’wätter ned so mit gspöut, mir hei bis jetz no nie am tag räge gha, immer nur znacht. Aber hüt het sich der himmu plötzlich verdunklet und i bi de hei gange. Es esch de zwar ersch es paar stund spöter cho rägne und ou nur 2 minute, aber i mues haut do zersch s‘ wätter nochli kenne lerne J

Am morge s’letschte brot zur gfrüri usgnoh, das heisst, morn am morge kei zmorge…nei das geit gar ned, auso hei mir üs entschlosse mitem bus is ichoufscenter „gaisano“ zfahre nach carcar. Mir hei jo aui zyt und chöi üs spontan für öpis entscheide und so mache mir das eigentli ou ganz gärn!

Mir ausi ufe bus und hei de in carcar, wo mir usgstiege si no e entdeckig gmacht , dört gits no e lade dä heisst SM, save more, und dört gits ganz gueti sache, ou sehr schöni früschi frücht und gmües, aber das hei mir ned kouft, wöu mir jo immer do bi üs a markt gö. Aber i ha zum bispöu für mi koffeinfreie kaffi entdecktJ und ou süsch hets no gueti sache gha…mir si de no wyter i „gaisano“ und hei üsi sache aui erledigt und hei üs weder ufe wäg ufe bus gmacht. Der erscht wo cho esch, isch heillos überfüllt gsi, eine ohni klima, mir fahre eigentli immer mit dene, aber wenn muesch stoh, i au den eiheimische inner, das hei mir de doch ned wöue und hei ufe nöchscht gwartet, aber jede wo cho esch, esch übervoll gsi! auso hei mir der nöchscht klimatisert gnoh und hei fasch die ganze 1 ½ std müesse stoh. Ersch baud wo mir deheim si gsi, hets chli glugget. Plötzlich het mi vo hinde e jungi philippa agstupst und het mir e freie platz zeigt, i söu doch abhocke, i ha gseit, nei si söu nur sitze, aber si het partou ned wöue, auso bini (gärn) abghocket und ha mir überleit, „weisch wenn merksch das aut bisch? Wenn dir öpper e freie platz zum hocke abietet“JJ

 schlussändlech hei mir für das aues inkl.  bus 49.- usgäh…

Ufem heiwäg si mir no go wasser bstöue und si hei gseit er bringts grad, choschtet aber 5 peso meh!

Na ja 18 liter wasser choschte 20 peso, das si ca 43rappe und wenn ers bringt choschtets ca 53rappe

Woners brocht het, hani am pesche gseit er söu ihm 30 peso gäh, aber er het gschnuppet wie ne stier und het gseit, „ nei, es choschtet 25 und ned 30“ , ok i ha ihm de 27 gäh, schliesslech het er die fläsche ufem buggu zu üs hindere treit und es esch extrem heiss gsi, uf der app hets gheisse 35° gefühlte 46°, auso hei mi die 2 peso ned groue….

No es paar detail zum huus wo mir grad wohne…cha nur säge zum glück hei mir ned länger aus 2 monet das huus gmietet! Mir wohne do mitz drinn bi de iheimische, das esch ned schlimm, die si aui ganz nätt und fründlech, aber dä lärm do, das esch ned zum goube! Wo mir acho si, esch jo grad oschtere gsi und do si d’lüt extrem glöibig! Mir auso tot kaputt acho, aber vo schlofe kei spur, die ganz nacht hei die oschtermäss gha und de ned eifach i der chile, nei do si übers ganze dorf verteilt  lutsprächer..es esch gsi, aus würde die i üsem schlofzimmer singe und predige, eifach horrorL üse vermieter het gseit, jo das esch über d’oschtere so. ok  mir gloube das! Aber das nach der oschtere no e ganzi  wuche fiesta esch, wo jedi nacht karaoke gsunge und technomusig  glost wird, natürlech ou über die lutsprächerL, das hei mir jetz säuber usegfunde*grins* am samschti ufe sunntig hei si bis am morge am 3 musig(wenn me dem so cha säge) gha. Und am morge 4.45 het der pfarrer scho weder s’erschte halleluja gsunge*oh mein gott* mir pfure ou es halleluja wenn mir ändli as meer abe chöi go wohne…wenn ned musig esch die ganz nacht, de chräie güggle, oder d’hünd bäue und näh nang am grind*chpfschüttle*, das geit do zue, das esch der wahnsinn. Am tag esches meischtens ruhig, es git ou täg do het üse nochber e afall und lot sini musigalag uf der höchschte lutsterchi lo loufe, de säg i aue zum pesche „kei fliessend wasser, kei schiessi, aber e musigalag“J. Mir düe zum biespöu ou nüm dusche, gäu jacqueline, nei mir düe jetz „eimere“. Da mir meischtens kei wasser hei, hei mir immer 2 chessle vou wasser parat, eine bim wc und eine i der duschi, so chöi mir „eimere“ wenns kei wasser hetJ d’huustüre het 2 riesespäut, dört chöi die gröschte gekkos inecho, oder ebe  ou am pesche sini lieblinge, spinne so gross wie sini handJ , am obe düemers immer vermache mit tüechli, damit ir nacht nüt inecha cho…Leider wird ou süsch ned so zum huus gluegt, überau hets chliini späut und löchli,muggegitter si zum teil kaputt, so chöi  mugge  inecho und auerhand angers gviech.., i ha jede tag e huere kampf damit i die sieche ned im ganz huus ha, am pesche esch no glich, wöu si zapfe jo mi ah und ned ihn;-) süsch wärs ganz ok do, super ussicht ufe pazifisch ozean, churzi wäge für is dorf oder ou as meer…

Der michael, esch üse jeztig vermieter, het üs gfrogt ob mir mit wette cho uf cebu city und mir hei das gärn agnoh, da mir jo wägem visum hei müesse go luege und er kennt jo das züg aues weis wo was esch und de esches für üs am eifachschte wenn mir mit so öpperem chöi go. Überhoupt si aui sehr nätt zu üs und häufe wo si chöi! Das macht vöu liechter für üs! Auso  er het gseit mir müesse am 05.30 parat si, er fahrt immer um die zyt, damit me ned im gröschte verchehr mues fahre. mir si ca 8.00 in cebu city a der süd station vom bus acho und dört esch sini frou d’leslie usgstiege si het verschiedeni termine gha, bim frouearzt und bim zahnarzt, mir würde si de weder träffe vorem heigo. uf der migration acho, hei si üs es formular id finger drückt und gfrogt ob mir foto heige,nei hei mir ned…, i ha der michael no gfrogt ob mir ned foto bruche und er het gmeint, er gloubt s‘ erschte mou ned. Er esch natürli ou scho 20 johr do, cha si das denn no angersch esch gsi , der foto lade im gebäude macht aber ersch am 10i uf, was jetzt? Der michael macht der vorschlag, das mir zersch gö go läbesmittu poschte und angeri sache wo er mues ha.auso los…i cha ned gloube wie dä dur die stadt fahrt, e sones gedränge und e verchehr do chönnts eim schwindlig wärde und i froge mi wie er weiss wo mir überhoupt no si!so hei mir verschiedeni sache erledigt und es esch ca 10.30 gsi wo mir ines riese ichoufscenter si, wo er irgendöppis imne gsundheitslade, öppis wie bi üs reformhuus, het müesse go hole, dört hani de gseh, das es fotogschäft het und der pesche und i si ine go foto mache, nur hei si üs gsekît es geit 1 std bis si abholbereit si, so esch der michale no angeri sache go erledige und der pesche und i mir si nöime ine ghocket und hei mou das formular usgfüllt vo der migration. Wo mir foto si go abhole, eht der michael gmeint, er dänkt das es ned schlau esch wenn mir um die zyt no uf migration gö, es heig zvöu lüt, mir würde de das ufem heiwäg in dalaguette im reisebüro mache, mir si natürli iverstande gsi, wöu üs hei aui gseit muesch eifach luege das am morge früeh dört bisch, süsch chas si das dört hockigsch und zletscht chunsch ned mou me dra. Auso hei mir üs ufe wäg gmacht zum go luege wie wyt das d’leslie esch,si het nür der gliiche tue, auso hei mir agnoh, das si immer no bim zahnarzt hocket. Mir si no angeri sache go erledige für e michael, er bout jo hüser do in alcoy und het no diverses boumaterial brucht, auso esch er wyter mit üs i der stadt umegfahre vo eim veirtu is nöchschte…ca am 3 het er a der leslie aglüte wo si esch, do seit si , si esch immer no bim zahni ufem stueh…das esch es theater gsi, mir hei bis am 16.15 uf si gwartet und de hei mir müesse pressiere zum hei goh, wöu wenns fieschter esch chasch do ned outofahre, das esch läbesgföhrlich vorauem ou für die tricycle, die fahre jo aui ohni liecht ume und überhole und fahre uf der falsche syte, eifach scho wenns häu esch e gfohr, geschwiege de wenns dunku esch..mir heis grad knapp gschafft, ca 2km hei mir no im fieschtere müesse fahreL

I bi nur froh gsi, das es wäg der leslie so spot esch worde und ned wäg üs, i hät es mega schlächts gwüsse gha! Mir si am 05.30 furt und am 18.45 weder deheim gsi, ohni visum, aber mit fotoJ

Am andere tag si mir uf dalaguette mit de päss und de foto und si het gseit mir chöi si am mäntig bringe de wird’s gmacht, choschtet haut chli me aber das esches üs wärd für das mir ned uf cebu city müesse…

So mir si hüt am morge mitem bus uf dalaguete und hei das mitem visum chönne erledige, es esch ganz eifach gsi und am Mittwoch chöi mir päss mitem visum  go hole(hoffe das klappet)

 Es gseht us aus würd sich das langsam ispiele do in alcoy…

 

Wo mir hei si esch mir ned so guet gange, woni zum bus us ha wöue stiege bini fasch uf d’schnurre gheit, bi de aber glich no ohni sturz usecho, aber chum uf der stross hets mi ufe sack gschlage…aues ufgschürft uf dene super strosse do jo keis wunder;-)

Mir si geschter am riccardo sis huus go aluege, er wott jo verchoufe, leider esch sini frou do ned glücklech gsi und esch weder hei und jetz probiert sis huus z verchoufe und geit nachär ou hei… mir si sicher 4 std bi ihm gsi, esch ou ganz e feine typ und mir heis mega guet gha mit ihm und me het ihm ou agmerkt, das er glücklich esch ändli weder mou ned elei im huus zsi! Er esch jetz scho sitem februar eleini und cha ersch nach dütschland wen er sis huus verchouft het! Er rächnet mit emne johrL

Es si truurigi momänte wenn me das so mit überchunnt, wenns eim vo beidne nümm gfaut, oder es sich das angersch vorgstöut het weder ases de schlussändlech usecho esch, und dä jenig, dem wos gfaut, mues sis neue schöne deheim ufgäh wägem partner… uf jedefau si mir weder mou froh, das mir nüt wie choufe oder wei boue do…wenns de haut ned geit, de chame packe und weder hei ohni grosses tamtam…mir hoffe bi üs geits guet, aber mir chöi das ou noni säge, mir si jetz ersch e feriezyt do….abwarte!!

 

 

....für am 1.04.2015 hei mir der flug buechet..aui hei gseit, esch das e apröu scherz? aber mir heis ärnscht gmeint, und wie… am 1.04. bin ig wie vo der tarantle gstoche am 05.45 erwachet und ha sofort uf mis natel gluegt, i weis ned wieso, aber irgendwie han ig eifach e siebte sinn für so sache. do hani es sms druffe vo der singapore airline das üse flug vom 11.45 uf 18.50 verschobe esch..i ha gmeint es sig e scherz(1.apröuJ)das cha doch ned si das dä flug um so mängi std verschobe esch und das scho am morge früeh*chopfschüttle* ig natürli sofort uf und go umetelefoniere, bi dem typ vo der hotline hani scho gar kei name me müesse säge, dä het mi scho kennt nachem 5.mou alüte;-) aber er esch immer ganz fründlech und höufsbereit gsi. er het mir zwar ned chönne säge wieso, aber das die maschine scho 9 std. zspot in singapore abgfloge sig und deshalb die verspötig heig. für üs ned ganz unproblematisch, da mir jo no e wyterflug vo singapore nach cebu buechet hei gha..aber do hani jetz nüt chönne mache, aber sofort hani a üse schofför, a beat heri dänkt und ha ihm sofort aglüte! er het komisch glost wo ig ihm scho am morge am 6i aglüte und ihn gweckt haJ er esch erchlüpft, er het gmeint er het verschlofe, aber i ha jo ou ned dänkt das er bis am 7.30 im bett cha bliebe wenn er mit üs am 8.00 z’däredinge abgmacht het*lach* mir hei e neue termin gmacht und er esch de haut grad go schaffe, damit er üs am nomi het chönne ufe flugi tue(danke beat) für üs esch jetz weder s’warte losgange, aber lieber deheim aus ufem flughafe.. am 14.00 si mir de pünktlech abgfahre richtig chlote. Der beat und der matthias si mit üs sicher uf chlote gfahre. Mir si grad sofort a check-in schlater und dört hei si üs gseit mir chöine ned vo singapore nach cebu, mir müesse über manila, wöus haut eifach vo der zyt här nüm gstumme het…der pesche het das ned wöue, wöu me in manila immer mues gos gepäck hole und de wieder ichecke.de darf me nur 10kilo gepäck ha, aues andere esch übergepäck.singapore hät das üs zrug zahlt aber der pesche het das eifach ned wöue.sie hei üs de abote in chlote es zimmer znäh und de ersch am andere tag mit der reguläre maschine zflüge, damit mir in singapore ufe aschussflug chönne, singapore airline würdi aui chöschte träge. Auso hei mir üs entschlosse is hilton zgoh und dört e nacht zverbringe..leider het er üs ned chönne ichecke, aber er het gseit mir chöi ab 08.45 am morge ichecke und wöu mir jo so noch si gsi, hei mir das ou ned so tragisch gfunde. So si mir mit üsne begleiter no i bar im hilton eis go zieh…“beat i säge nume schoggieili“;-)) Am nöchschte morge mitem shuttle sofort a flugi, a checkin schalter und dört gwartet, mir si bi de erschte gsi..der herr waldvogel vom tag vorhär esch de ou scho cho und mir hei das eigentli super gfunde, wöu dä gwüsst het um was das bi üs geit, auso los zu dem a schalter..er het üs ou grad weder kennt und esch sehr fründlech gsi, nur het er irgend es problem gha, er het de wyterflug ned chönne bueche.er het gseit si hege das geschter scho gmacht, aber irgendwie chönner kei boardingcharte usdrucke.nach öppe 2std, het er gseit es sig keis problem, mir söue eifach in singapore a schalter, die würde üs de scho e charte usdrucke der flug sig jo buechet. Ok mir gloube jo aues wenns fachpersonal eim öpis seit! Denn öppis vom schlimmschte woni je erläbt ha..dä start(jo beat ig weiss du gloubsches ned) Dir möget euch sicher erinnere wies gstürmt het i der schwyz i dere zyt..jemmers gott bis dä flugi ir luft esch gsi und dä hets umegschleuderet i ha richtig schiss gha..und de der ganz flug turbulänze und luftlöcher, i bi nach 10 std so seechrank gsi, aus wäri ufemne schiff uf singapore greist! @margrit ig hanes halleluja pfurret wo mir ändlech dört glandet si!! Wie üs der herr waldvogel gseit het , si mir sofort a singapore schalter und dört hei si üs ou keini boardcharte chönne gäh.i bi afe fasch übergheit…nach 2 stund ändlech esch uscho, das der herr waldvogel üsi flüg buechet het und üs uf d wartelischte gsetzt het wöu der flug totau überbuechet esch gsi!wär nätt gsi wenn er üs das gseit hätti*kopfschüttle*i bi so verruckt gsi, am liebschte wär i zrug und hät am herr waldvogel glatze chli gstreichlet mitere drohtbürschteL jetz hei si üs weder es hotel abbote und e flug für am andere tag buechet, mir hei zum glück üses gepäck dörfe am flughafe lo und si hei üs versproche, dass es morn ganz sicher mit em glieche flüger wie mir flüge reistJdo si mir doch mou gspannt…mir auso is taxi und is hotel, es esch morge früeh gsi und i ha gar nüt gschloffe gha und wie gseit mir esch chotzübu gsi, und so bini froh gsi das i ändli chli ha chönne go ablegge.i ha chli zwieflet ob das schicksal esch wo üs wott dervo abhah das mir für immer d‘ schwyz wie verloh..ha de ou öppe 4std gschloffe und de esch mir weder chli besser gange..am andere morge hei mir am 6i uf müesse, zmorge näh und de weder ab ufe flughafe…ändlech am 9i esches losgange i has fasch ned chönne gloube es klappet! Mir hei e super ruhige flug gha, wunderschöni landschaft, es esch gsi aus würde mir über maledive flüge, philippine het jo über 7000 insle und es esch würkli schön gsi het für vöu entschädigt. Ändlech hei mir üses ändziel erreicht und si uf cebu acho.nur esches jetz so gsi, das üs der uwe ned het chönne cho abhole, da mir jo 3tag spöter ersch acho si.auso hei mir üs es taxi gnoh und hei e mega kamikazefahrer verwütscht, er het schwarzi läderhändsche, woner finger abgschnitte het, agha und het gmeint er mues üs zeige wie är guet cha outofahre, mir hei ihm 2 oder 3mou müesse säge er söu chli langsamer fahre…er hets de plötzlech begriffe das si fahrstil  üs ned idruck macht. Ändlech si mir in alcoy am marktplatz acho, wo der uwe und heike uf üs gwartet hei und üs is huus brocht hei.mir hei churz öpis zäme trunke und de si si weder gange und mir ändlech scheiche strecke und versueche schlofe.leider ned möglech gsi, es esch jo oschetrsamschtig gsi wo mir acho si und philippine si jo sehr katholisch und chli obedra esch grad chöuche , do wird die ganz nacht predig gläse und gsunge und das wohl verstande mit usselutsprecher, auso mir hei gmeint dä steit bi üs i der stubeLi übertriebe ned, es esch die ganz nacht gange bis am andere tag..auso nüt mit schlofe.aha jo de si jo no güggle, die chräie ou di ganz nacht und de natürli d’hünd ned vergässe(jetz ghör i die scho gar nüm).auso das huus wo mir jetz dinne si, esch zum glück nüm lang üses deheim, es esch so lut do, am tag schloffe aui und i der nacht meine si, si müesse die ganz nacht musig fürs ganze dorf lo loufe, i der schwyz hätisch scho lang e azeig am haus.. I ha jo scho deheime no es super schöns huus gseh, wo der uwe is facebook gstöut het und ha ihm denne scho gschrybe mir wette de das gärn go aluege und do han ig ihn weder druf agsproche und de seit er, das esch grad das do unde a euch.ha ihm gseit er söu doch e termin mitem bsitzer abmache zums go aluege.es esch in alcoy ned eifach öpis schöns zum miete zfinde und mir wie jo eifach im momänt nüt choufe.. Am sunntig esch üs der uwe und heike cho hole und hei üs mou chli s’nötigschte zeigt vo alcoy und s’nochberdorf dalaguette.mir si am märet gsi und ig ha id apotheke müesse öppis go hole gäge mini muggestiche, i ha es ganzes schlimms bei gha, aber do esch das jo keis problem, do chame eifach id apotheke und die gä eim antibiotika. Aschliessend si mir  as meer öpis chlises go ässe. Mir si gli weder hei, mir si wahnsinnig uf der schnurre gsi und mir hei jo ned ferie, sondern mir bliebe jo jetz chli doJ Am sunntigzobe het üs der uwe aglüte und gseit der lothar, das esch der bsitzer vo dem schöne huus, sig nur no am mäntig do, denn fahrt er weder wäg uf cebu city, dört wohne si under der woche, wöu si no es meitli hei wo dört id schuel geit, und mir söue morn am morge am 9i parat si um das huus go azluege. Am morge „dütschi pünktlechkeit“J steit der uwe do und mir si mit ihm dört abe gfahre.scho wo mir inegfahre si, hani gseh das esch öpis ganz bsunderigs, e super gepflegti ifahrt, der garte vom fienschte und ou s’huus esch aues neu renoviert, scho wo me der erscht schritt inegmacht het, wow es het e igangsbereich, normau steit me nämli immer grad i der chuchi wenn m eines huus inechunnt, e ibauchuchi, das gseht me do ou ganz säute, diräkt am meer, mit eigetem meerzuegang,es schöns grosses schlofzimmer, es riesigs badzimmer, es gästezimmer mit eigetem badzimmer, eifach nur schön..i ha sofort gwüsst, das esch das huus wo ig eigentli wett, aber i ha jo no e ma wo ou mues iverstande si und der prys esch ebe ou über üsem budget gsi.mir hei ihm gseit es gfaut üs sehr , aber mir hei ned so vöu gäud wöue usgäh. Er het gfrogt was mir de fürnes budget heige und mir heis ihm gseit und er het gseit er würd scho sövu mitem prys abegoh und mir hei gseit mir überlegge üs das mouJ geschter e woche spöter ha ig ihm aglüte und gseit mir würdes gärn miete und jetz si mir morn am 3 bi ihne iglade zum kaffi um aues wytere bespräche Es si würkli 2 ganz nätti , si esch e philippini aber si redt ganz guet dütsch, är e dütsche.si hei i der city no es huus und de süsch no nöime..uf dem grundstück wohne mir jetz de im gästehuus und de esch no sis huus und 3huusagstöuti hei o uno es huus, aues esch ighaget und de hei si e rottweiler wo das ganze bewachtJ i freue mi uf jedefau! Nach öppe agnerhaubstund si mir weder hei und hei üs entschlosse, das mir nach carcar fahre wägem internet go luege. Mir dörfe jo am nochber sis outo bruche und so hei mir üs uf d’socke gmacht, chli bammu hani scho gha, s’erschte mou uf dene strosse fahre, mit dene chaote und kamikazefahrer zäme.der pesche het jo kei internationale uswyss und so ha ig müsse fahre.am afang bini seeehr vorsichtig gsi, do hei si mi links und rächts überholt, sogar der bus het mi überholt weni graset bi wiene verrucktiJ In cacar hets e kreisu, so öpis heit dir o uno nie gseh, das het mind 3outo näbe nang gha,wohlverstande es esch nur ei spur dänkt gsiJ mi het eifach müesse mitfahre, es esch gar ned angers gange und es het e riese stou gha im chreisu inne*lach* aber mir heis gschafft, nach ca 1 ¼ std. si mir heil acho im gaisano, so heisst das ichoufscenter wome so ziemlich (fasch) aues überchunnt. Mir hei üsi sache erledigt, hei es inetrnetchäschtli kouft und süsch no wichtigi sache und si de weder hei zue. Ufem heiwäg esches de passiert, esch mir eine hingedri gfahre, es moped mit 2 lüt druffe. Zum glück hets niemerem öpis gmacht, si hei chli benomme usgseh, aber si beid gstande und der fahrer het sich gäng weder entschuldigt, er het ned gseh, das i blinke und het mi wöue überhole, grad i dem momänt wo ig nach links abbiege..blöd gange Mir si auso wytergfahre und deheime hei mir das chäschtli us probiert und aues esch tip top gange. Öppe 2 std spöter kei internet,der pesche esch grad mit em matthias am skype gsi wos fertig esch gsi. nei das darf doch ned wohr si..es esch e so, das mir e 24std charte zur überbrückig übercho hei, bis angere ufgschaute esch gsi.jetz hei mir mitem skype und der pesche het no irgendöpis wöue abelade, damit er cha föume luege,üses kontingänt scho ufbrucht gha. Weder kei internetJ Am andere tag hei mir die angeri charte ineto und mir hei eifach ned is internet chönne, üsi nochbere die chunnt no drus, die esch cho üebe, aber si hets ou ned fertig brocht, es het immer gheisse passwort nicht korrekt…ok weder e tag ohni internet.. Ok am donnschti, der pesche esch si erscht touchgang go mache am morge und ig bi no einisch zur nochbere übere go luege wägem internet, ha dänkt si aus philippini cha uf d’hotline alüte, wenn si uf d’hotline aglüte het de esch nur e outomat cho und me het nüt chönne froge oder säge;-) das esch ebe asieJ Wo der pesche hei cho esch, hei mir gseit mir gö jetz no einisch uf carcar, es esch zwar scho nachem mittag gsi, aber glich, mir hei jetz eifach internet wöue.auso mir is outo und los, es esch vöu besser gange vom verchehr här, der kreisu hei mir fasch „normau“ chönne fahreJ Mir si grad sofort weder i globe shop ,das esch ouno witzig, wenn dört häre chunsch, de chunnt der security und frogt was du bruchsch, du seisches und är entscheidet, ob du e nummere muesch zieh, oder ob du sofort chasch füre go warte. Aber s‘ beschte esch jo, dass du aus usländer immer zersch dra chunsch, egal wieviel lüt das do scho warte(und es sind ned wenigi,beidi mou bestimmt me aus 10 persone vor mir) mir  esch das so unagnähm gsi, aber immer weni ha wöue dört astoh und warte, het er mir gseit i söu grad füre a schauter go hocke.jetz stöuet euch einisch vor, i der schwyz hocket dir im wartzimmer bim dokter, dört esches nämli ou so das het mir d’heike gseit, und de chunnt e ussländer und dä chunnt aus erschts dra, was meinsch wie do d’höll los wär*chopfschüttle* auso uf jede fau hei si feschtgstöut das es fausches pw esch installiert gsi, na super, so öppis cha nur üs passiere*grins* e sach vo 5 minute und mir hei weder chönne go und für das hei mir müesse ei wäg 1 ¼ std outofahre*grummel* Am frytig hei mir ändlech mou chli e ruhigi chugele gschobe, der pesche esch go touche und i bi gägend go uskundschafteJ Am samschtig si mir bi üsem jetzige vermieter yglade gsi zum znacht, er het üs manghähnchen ufem grill gmacht, mit gmües und pommes und salat, es esch super guet gsi, ha no säute sones guets poulet gha, usser bim urs leuenberger natürli. Da mir jo s’outo sowieso brucht hei zobe , hei mir gseit mir fahre mou chli meh richtig süde, es esch super schön gsi! mir si ou durch oslob gfahre,  dört esch ou dä park wome met de walhaie cha go schnorchle, aber leider het der pesche ned inewöue, er findet das ned guet was die dört mache. Aber ig gseh do nüt schlimms, die si jo schliesslech ned igsperrt, die chöi jederzyt furt schwömme wenn si nüm wei dört bliieb. I chume de scho einisch derzue dört häre zgoh, schliesslech esch das mitem outo nurb e chatzesprung vo üs ewäg… Am sunntig si mir zum meili beach resort abegloufe, das esch es schöns resort(wenn mir de dunde wohne esch das üse nochber, oder mir sine*grins) das esch e schwyzer wo dört vor es paar johr es huus boue und no es gäschtehuus derzue und de het er gmerkt, das er das guet cha vermiete, aus het er no eis boue und no eis…e würkli sehr schöni alag, ou do aues gepflegt super schöni bungalow eigete strandabschnitt und pool.zimmer choschte 1900peso, aber wenn me früehzityg buecher gits no rabatt und wenn mir öpper bringe, de macht er ouno einisch rabatt, chasch auso bis zu 40% usehole.esch e gueti alternative, wenn öpper ned bi üs wett wohne wenn dir mou chömet, oder wenn mir mou usbuechet wäre*lach* Am mäntig esch der pesche weder go touche und ig ha mi uf d’socke gmacht weder go gägend erkunde, das mou bini i di angeri richtig und ha mini badsache mitgnoh, i ha jetz eifach mou is meer wöueJ Ufem wäg dört häre bini a nes huus häre gloufe, es esch der wahnsinn und der zuefall hets wöue, dass grad der bsitzer usechunnt und i ha ihn gfrogt ob das sis huus esch, er het gseit jo i darfs gärn cho aluege, er wotts verchoufe.sini frou esch scho weder in dütschland, si het heiweh gha nach de grosschind und jetz, nach 1 ½ johr müesse si das aues weder verchoufe. Das huus leggt diräkt am meer, eigete strand abschnitt e infinitypool, e chuchi, eifach der wahnsinn, aues chame ha für 250000.- mit möbu 2 outo, was das herz begehrt, er het mir scho chli leid to, er het gseit, „was soll ich machen, meine frau und ich wir sind seit 40 jahren zusammen“ und het derbi träne i de ouge gha! E sones awäse das chasch niene für so gäud choufe!aber mir wie jo ned choufe, auso bini schnäu wyter, bevor i mi ha lo verführeJ I bi de würkli is meer go bade und es esch wunderbar gsi, mind 29° warm und kei mönsch ume, eifach troumhaft.. Am nomi wo der pesche esch heicho, hei mir gseit mir gö wäg, wöu mir putzfrou bstöut gha hei, de cha die i auer ruhe putze ohni das mir störe, so si mir no mitem tricycle ufe narrapark ufegfahre und si go luege wases dört so aues für hüser git, aber das esch nüt für üs, vöu z’stotzig und e richtige pass bis dobe bisch fahrsch ca 10 minute passstross…wo der anger üs abglade het, hani no dänkt ob i söu froge ob er wartet, aber er het abgwuncke und gseit die heige do e service de chönn me weder es fahrzüg bstöue, ok mir hei das gloubt…überraschung, wo mir weder abe hei wöue het üs der security meng seit, das hei si ned…waaaas i cha sicher ned bi 33° und aus a der sunne das loch abloufe, der pesche het gseit chum mir müesse loufe wie wosch süsch abecho..:-( auso hei mir afo loufe, es si immer weder töffe ufe gfahre, aber aui immer vou belade. Doch plötzlech i ha scho baud ufgäh gha, chunnt eine, e junge ma mit ere enduro maschine und dä hani aghaute und ne gfrogt ob er üs ned würd abe tue i würd ihm de ou öppis zahle, er het glachet und sini maschine kehrt und mir si hingedruf ghocket und er esch mit üs s’loch abgfahre.i ha vo afang a gseit er söu so guet si und langsam fahre, er esch würkli super aständig gfahre, aber i ha glich fasch id hose gschiesse hingedruffe, ha mir immer überleit wenn mir umgheie, i mit de blutte bei und arme, weisch wie do usgsehsch oh mein gott…aber es esch aues guet gange und er het üs sicher und wohlbehalten dunde abglade. I ha ihm 60 peso(esch öppe e 1.50 id finger drückt und er het die 3 nötli agluegt und mi agstrahlet und i bi so happy gsi, das mir weder dunde si gsi. aber nur üs cha so öpis passiereJ wo mir hei cho si, hets 4 paar schuhe vor der huustür gha, i ha dänkt was esch jetz passiert, do het do e ganz putzequipe üses huus putz, 3froue und ei ma, sogar no d‘ fänschter hei si putz, eifach aues inkl terrasse ufwäsche. und wo si hei esch het si no e grosse sack vou wösch mitgnoh. Jetz chunnts, i troues fasch ned z’säge, aues het 600 peso koschtet, das si grad mou 13.- sorry froueJ Geschter, am zieschtig, hani sogar der pesche chönne überschnorre mit mir go bade, auso hei mir üs nachem zmorge uf d’socke gmacht und si as meer abe, es esch supi gsi, aber eifach chli müehsam wenn nachem bade, wenn erfrüscht bisch, weder dä hoger uf muesch chracksle und das esch e hoger, das chani euch säge. I mues jedesmou mittsdrinne ahaute und verschnufe bis i der räschte cha näh, esch natürli ou angersch bi dene temperature do..so freu i mi umso meh wenn ig de vo deheime us cha is meer go badeJ Hüt hei mir erschti erfahrige mitem öffentleche bus gmacht, si nachem zmorge uf d’houptstrosse und hei ufe bus gwartet, mir hei nach dalaguete wöue a märet und i supermarkt. Der schofför het üs gseit er fahrt i ca 10 minute ab und mir hei ihm gseit wo mir häre wie und wo mir si dört gsi, do het er aghaute und gseit mir müesse jetz do ustiege, mir si jo scho einisch dört gsi, so hei mir chli gwüsst wos dure geit und hei üsi sache gli mou erledigt gha und hei üs weder ufe heiwäg gmacht, natürli weder mitem bus. Aues esch super gange keini besondere vorkommnisseJ So das esches mou chli gsi, wenn öpis sett passiere, wird i de das weder brichte